Að veiða nornir eða hvali?

Ég ætla ekki að halda því fram að ég sé fróð um hvalveiðar, hvalveiðistofninn, veiðarfæri hvalveiðibáta eða hversu hratt blessuð skepnan deyr eftir að  búið er að skutla hana. Spurningin mín er hins vegar þessi (í framhaldi af fréttinni um hvalaskoðunarbátinn sem elti hvalveiðibátinn) ... hvaðan kemur þessi krafa að hvalveiðar eigi að vera mannúðlegar og hver dæmir um það hvað er mannúð og hvað ekki. 

Nú skal það koma strax fram að ég er fylgjandi hvalveiðum svo lengi sem það er markaður fyrir kjötið. Mér er líka umhugað um réttindi dýra og að þau séu ekki pyntuð eða misnotuð. Veiðar finnst mér falla í allt annan flokk.

Það er nákvæmlega ekkert mannúðlegt við það að drepa aðrar skepnur og því skil ég ekki tilgang hvalaverndunarsinna að taka myndband af því hvað þetta er ómannúðlegt. Ég skil heldur ekki af hverju hvalveiðimenn vilja endilega halda því fram að veiðarnar séu mannúðlegar og að hvalirnir drepist hratt. Er það ekki frekar gefið að veiðar eru ómannúðlegar? Spyr einhver þorskinn hve hann þjáist þegar hann er halaður upp úr sjónum? Er einhver sem athugar hversu vel skotið hittir hreindýrið og að það deyi nú örugglegar samstundis? Veiðar eru í eðli sínu ómannúðlegar, við þurfum ekki myndband til að sanna það og það skiptir ekki máli hversu hratt skepnan deyr. Hins vegar efast ég um að nokkur stundi veiðar í þeim tilgangi að pynta dýrin og láta þau þjást (nema sjúkir einstaklingar en um þá er ekki verið að ræða hér). Veiðimenn eru að ná í kjöt og því hraðar sem skepnan deyr því minna stressast hún og því betra verður kjötið, það er enginn leikur að bráðinni nema kannski spennan sem fylgir því að finna hana og ná skotinu. Ef veiðimaðurinn hittir dýrið ekki beint í hjartastað (eða heila) þá er það ekki vegna þess að honum þykir svo gaman að sjá dýrið þjást heldur vegna þess að hann hitti ekki betur. Hittni þykir mikill kostur á meðal veiðimanna einmitt vegna þess að þeir vilja ekki draga dauðastundina á langinn. 

Að halda því fram að út af þessu séu veiðar mannúðlegar eða reyna að sanna að þær séu það ekki þykir mér samt algjör óþarfi. Dráp eru ekki mannúðleg, að svipta einhvern lífinu er ekki mannúðlegt. Það er samt alltaf reynt að koma í veg fyrir óþarfa þjáningar, stundum tekst það og stundum tekst það ekki. Markmið veiðimannsins er það sem skiptir máli - er hann að veiða til að pynta dýrið inn í dauðann eða er hann að veiða til að afla sér og sínum viðurværis (og þá erum við ekki bara að tala um kjöt í matinn heldur að fá borgað fyrir veiðina o.s.frv.). Skiptir hvalur hér meira máli en kýr með fjóra fætur?

ESB: Hvalveiðar þvælast fyrir

Athugasemdir

[Fannar frá Rifi, 10.7.2008 kl. 15:14]

vel mælt.

Ein spurning til þeirra sem láta sér svo annt um hvali og annarra ef þeir vilja svara.

Eru hvalir menn? 

mitt svar er: Nei þetta eru dýr og eru á engan hátt ólík öðrum dýrum. Ef kýr væri 25 tonn, væri hún þá allt í einu orðinn eitthvað heilög? 

Disney-væðinging tröllríður umhverfissamtökum. Free Willy og fleyri myndir hafa gert marga algjörleg ómeðvitaða um hvernig raunveruleikinn sé. "kjötið kemur út úr búðinni"dæmið.

[Ómar Ingi, 10.7.2008 kl. 16:46]

Skoða fyrst drepa svo

[Marilyn, 10.7.2008 kl. 16:51]

góður pakkadíll. Veit ekki betur en að ferðamennirnir flykkist á sægreifann og fái sér hrefnuspjót eftir hvalveiðiskoðanirnar ;)

[Brussan, 10.7.2008 kl. 22:05]

húrra fyrir sægreifanum

[jóhann (IP-tala skráð) 10.7.2008 kl. 23:15]

Neits, ekki skil ég heldur hvað þessi  hvalveiðiverndursinnar eru að rembast við að filma eitthvað um það hvernig kýr eru drepnar meðan kálfarnir horfa á, eða öfugt, ég man það ekki.

Ég meina, kommon, drepum bara hvalina, þetta er auðvitað auðlind, þó við verðum að selja japönum hana seinna. 

Og svo eru þetta bara tilfinningasamir Bandaríkjamenn, meðan við erum Íslendingar!