Vinnan mín...

... felst meðal annars í að reyna að koma auga á svona villur og ég held að ég hafi staðið mig ágætlega hingað til, það hefur amk. enginn fengið múskateitrun eftir að hafa eldað upp úr Gestgjafanum að mér vitandi.

Ég er samt að spá í því samt hvar ábyrgð blaðsins sleppir og hvar heilbrigð skynsemi tekur við? Veit fólk ekki hvernig múskat er á bragðið eða fattar það amk. á meðan það er að mala 20 (!!!) múskathnetur í duft (sem hlýtur að taka svolítinn tíma) að það er ekki alveg að fíla þessa sterku lykt og mikla bragð?? Eða kannski að skyrpa fyrsta bitanum af kökunni út úr sér því hún hlýtur að hafa verið virkilega bragðvond? Örugglega hömlulausar ofætur sem fengu eitrunina... gátu ekki stoppað eftir einn bita. 

Varð bumbult af múskati

Textamisskilningurinn mikli í Vikunni

Vikukonur drápu mig næstum í gær. Ég er ekki að grínast, ég er viss um að ef það er hægt að deyja úr hlátri þá var ég ansi nálægt því í gær og önnur ritstýran er til vitnis um það í sínu bloggi - við erum að tala um að ég vældi úr hlátri, tárin láku, ég var komin með verk aftur í hnakka af áreynslu og gat ekki komið upp einu orði. Í nýjustu Vikunni er nefnilega ansi skemmtileg opna um söngtexta, bæði erlenda og íslenska, sem hafa misskilist, t.d. hið fræga "i´m a leather face" með Natalie Imbruglia en svo fullt af misskilningi sem ég hafði aldrei heyrt áður.

Fyndnast fannst mér samt þegar mér varð ljóst að ég var "sek" um massa-misskilning sjálf, textafríkið! Textinn er úr íslenska laginu Skólaball sem Björgin Halldórsson söng fyrir margt löngu og misskilningurinn varð um þetta leyti: "... og upp að ljósastaur sér hallaði og um ennið hélt" en ég söng alltaf "upp að ljósastaur sér hallaði ofurmennið ég" - stuttu seinna er annar misskilningur sem ég spáði mikið í en held ég hafi nú oftast sungið rétt "ég missti mig og til hennar gekk" en ekki "ég missteig mig og til hennar gekk". 

Spurning hvort ég skrái mig í Singing Bee eftir að hafa orðið uppvís að svona rugli! 

Ég er ekkert að grínast með þetta

Steingeit: Viðskiptavinir, yfirmenn, fjölskyldumeðlimir - allir virðast þarfnast þín núna. Það er vegna þess að þú ert ofurhetja með skilningarvit skörp sem hnífur.

 

Svona hljómar stjörnuspáin mín í dag. Takk fyrir og eigið góðar stundir. 

Ég er að safna mér fyrir svona...

en þangað til ég næ að skrapa saman fyrir því verð ég bara að gera eins og skítugur almúginn og kíkja út um gluggann til að athuga þetta, geðveikt plebbalegt. Spurning hvort pabbi gefi mér annað veð í húsinu sínu?

Lúxusúr sem sýnir ekki hvað klukkan er

Inni í mér...

dansar brjálæðingur. Ég hef ekki fengið stundlegan frið fyrir spörkum í dag. Man ekki eftir að hafa fundið fyrir svona miklum tilfæringum inni í mér þegar ég gekk með dótturina, þá var fylgjudruslan framan á og dempaði allt. Núna er greinilega eitthvað annað uppi á teningnum því ég finn hverja einustu smáhreyfingu og snúninga og fékk eitt bylmingshögg í magann í dag líka. Það er stanslaust brölt í gangi og greinilega hress snáði að hafa það gott þarna.

Af mér er það annars að frétta að ég átti latann dag en fékk hingað sponsíu og við lásum saman í bókinni okkar góðu. Ég las reyndar svo mikið að ég fékk í hálsinn og er ekki enn búin að ná mér - sem er undarlegt í ljósi þess að ég tala almennt mjög mikið, svo ég held að ég sé barasta að verða lasin. Já og ég ánetjaðist bubbles á leikjanetinu - gjörsamlega ávanabindandi andskoti!

Tough in the D

Sameinaðir stöndum vér og sundraðir föllum vér... Gettópíurnar vita þetta, handboltalandsliðið veit þetta. 

Hvernig er það annars... er FF (Félag framhaldsskólanema) ekki til lengur eða var því sundrað í þessi tvö? Ég er sko fyrrverandi fulltrúi VMA í FF og það voru bara fín samtök þar sem rjómi framhaldsskólanema kom saman og ræddi m.a. um Gettu betur, Söngkeppni framhaldsskólanema ofl. Ég reyndi m.a. að koma því í gegn að það mætti syngja á öðrum tungumálum en íslensku þar sem verið væri að dæma söng en ekki lagaval en tillaga mín hlaut afar dræmar undirtektir. 

Yfirlýsing frá hagsmunasamtökum nemenda

Doggie-bag frá LV?

Þessi taska er sögð vera það næsta frá LV en ekki trúa öllu sem þið lesið. Hér er í raun um hálfgerðan gjörning að ræða en þessi hunda-taska er hönnuð af Meryl Smith og The Honey Space og hún er ekki partur af nýrri línu LV heldur er verið að sýna fram á fáránleika þess að hafa hunda sem fylgihluti.

 

Mín fer af stað eftir augnablik

Nú er mín örugglega að leita að bílastæði nálægt háskólanum, tilbúin í Sollu Stirðu-regnstakk og í rauðum Latabæjarbol (var ekki hægt að splæsa í annan lit en í fyrra?). Hún ætlar að hlaupa kílómetrann með pabba sínum og horfa svo á skemmtiatriðin.

Í fyrra fórum við líka með hana og ég týndi henni... fann hana loksins í tjaldi fyrir týnda krakka þar sem hún sat í góðu yfirlæti með einhverjum skemmtilegum starfsmanni sem var búinn að gefa henni alls kyns dót í boði Glitnis - svo það margborgar sig að týna krökkunum á Háskólatúninu á MenningarDAG.

Latabæjarhlaupið hafið

Þakið er að rifna af Lynghálsi

Það er nú alltaf stuð hérna og skemmtilegt fólk sem ég vinn með en herre Gud - það liggur við að ég geti talið mörkin á fagnaðarlátunum og vonbrigðastununum sem koma stundum inn á milli. Mikið er ég glöð að vinna á vinnustað þar sem er í lagi að vera í stuði, horfa á spennandi ólympíuleik og borða snakk og drekka bjór í boði starfsmannafélagsins. Gerist nú varla betra þó ég drekki hvorki snakk né borði bjór. Sama hvernig leikurinn fer (og þetta lítur vel út akkúrat þegar þetta er skrifað og klapplið hússins var að enda við að fagna) þá megum við vera stolt af frammistöðu Strákanna okkar í þessum leik og hey, við getum ekki endað neðar en í 4. sæti sem verður að teljast góður árangur.

Enn eitt fagnaðaröskrið... ég verð að fara og kíkja á "veggsjónvarpið" frammi. 

 

UPPFÆRT: VÁVÁVÁ - ÞAÐ LIGGUR VIÐ AÐ ÉG SKRIFI ÞETTA Í CAPS EN ÉG ÆTLA NÚ SAMT AÐ SLÖKKVA Á ÞVÍ NÚNA. Við erum að ræða gull eða silfur á Ólapíuleikunum! Ég er í geðshræringu og fékk gæsahúð inn að hjarta við að sjá alla þessa gaura skæla bara máttlausa af gleði eftir leikinn. Fagnaðarlætin urði ekki minni hér þegar Óli forseti sagði að við ættum að halda þjóðhátíð það sem eftir lifði dags - já sei sei, veit ekki hversu langt umburðarlyndi yfirmannanna nær en það má láta reyna á það.  

Hér má sjá Óla-píu á Ólapíuleikunum. 

Ég er viss um að nuddið gerði gæfumuninn.

 

Áfram þjóðhátíð! 

Íslendingar í úrslitaleikinn

Það verður stemning hér í vinnunni

Layout-deildin sló sér upp með tölvugaurunum í gær og tengdu skjávarpa inni í layout-álmu svo sem flestir gætu horft á leikinn í dag. Þau röðuðu upp stólum og bjuggu til rosalega flott plagöt í Matrix-stíl sem hanga hér um allt og eru bara í því að skapa heljarinnar stemningu fyrir leikinn. Starfsmannafélagið ætlar að bjóða upp á bjór og snakk á meðan á leiknum stendur. Þar af leiðandi verður líklega lítið unnið á meðan á leiknum stendur og jafnvel ekki mikið eftir að hann er búinn. Það er oft svolítið spes stemning hér á föstudögum - vikublöðin eru yfirleitt búin að skila svo það er mikið stuð á þeim og jafnvel sungið upp úr þurru, þessi föstudagur á líklega eftir að slá þeim öllum við í stuði og stemningu. Tala nú ekki um ef við vinnum leikinn. Áfram strákar!

Óhræddir og fullir tilhlökkunar